Goðaland

 

Básar

 

Básar eru mikil gersemi vegna þess að þeir eru einstaklega fallegir og hlýlegir. Þeir eru lítið dalverpi umluktir fjöllum á þrjá vegu en opnir til norðurs.

 

Mest ber á Bólfelli, litlu felli, kjarri vöxnu að mestu og hæst ber klettur sem nefnist Bólhöfuð eða Bólhaus. Frá Bólfelli teygir sig hryggur inn að Votupöllum en svo heitir gróin hlíð milli Útigönguhöfða og Innra Básaskarðs.  

 

Í daglegu tali er gönguleiðin í kringum Bólfellið nefnd Básahringurinn og er hann án efa vinsælasta gönguleiðin á Goðalandi. Hann ganga ungir sem aldnir, allir njóta hennar jafn mikið.

Suðaustan við Bólfell er lítið dalverpi sem nefnist Fjósafuð og í því eru nokkrir hellar og skútar og nefnist þar Fuðanefjaból. Þar átti sauðfé skjól en nú eru þarna áfangastaðir ferðamanna enda umhverfið stórbrotið.

 

Svo stórir eru hellar og skútar á þessum slóðum að hægt er að standa uppréttur í þeim. Í einum þeirra má að vetrarlagi sjá stórfalleg grýlukerti hanga niður úr hellisþakinu og á gólfinu á móti þeim eru íshnúðar. Ekki langt frá eru göng í gegnum fjallsrana og er hreinlega hægt að skríða eftir þeim og er þá komið út í brattri hlíð og er þaðan aðeins ein leið og hún er niður.