Stakkholt

Draugabólið við Fagraskóg

 

Fagriskógur í Suðurhlíðum stendur ekki lengur undir nafni enda var honum eytt á 18. öld en nafnið lifir engu að síður. Þó skóginn vanti er gróðurinn í hlíðinni engu að síður gróskumikill og hlýlegur. Nú hafa menn  reynt að greiða skuldina við landið og myndast við að koma trjágróðri til en mikið verk er fyrir höndum. 

 

Bólhöfuð er hluti af Suðurhlíðum og skagar í norðvestur nærri yfir veginn. Þar er skúti, gamalt náttból leitarmanna sem nefnt hefur verið Fagraskógarból. Vestar, við Steinsholtsá heitir líka Réttarnef og þar var fjárrétt sem sópaðist burtu í hlaupinu 1967.

 

Sagt er að í Fagraskógarbóli sé ekki allt með kyrrum kjörum og er því oft nefnt Draugaból. Stuttur gangur er þangað upp. Ekki fer mörgum sögum af draugum í bólinu á síðustu árum en ekki er að efa að nútíma fullhugar vilji reyna sig og gista í Draugabóli, - svona rétt til að sjá hvað setur. Vissara er þó að búa sig vel því áður var mönnum oft kalsöm vistin.